الجمعة، يناير 11، 2008

يا رب الساعة 6 تيجي الساعة 9


باللاكلوك الأرنب ده (بس بتاعي لونه روز)، و العيون النص مقفولة دي، و نظرة النعاس و البؤس دي، و المج (بس بتاعي على شكل فيل) أللي مليان نسكافيه، و اليبجاما دي (بس غالبا ما تكون لونها بنفسجي (لوني المفضل). و حيث أنني برج الأسد و حيواناتي المفضلة هي العائلة القططية . كده تبقى دي أدق صورة التقطت لي في حياتي. سيبكم من صور الأفراح و المصايف. دا تصنع و كلام فارج يا سادة. أنا بتكلم على الواقع اليومي. أنا اكره الصحيان بدري و معقدة منه من أيام المدرسة زمان. يعني هيجرى إيه لو الساعة 6 صباحا جت الساعة 9 خصوصا في الشتاء؟ يعني بعديها بثلاث ساعات؟ بس عشان أكون نمت و أرتحت شوية كده و هي تيجي بقى براحتها و نشوف شغلنا و احنا فايقين
ملحوظة: اللكلوك هو جهاز كده شبيه للشراب في مواد انتاجه و ضخم مثل الحذاء في الحجم. عادتا ما يكون على شكل حيوان و له ألوان فاقعة و فروة حول إطاره الخارجي و يكون مصنوع في الصين. ترتديه البنات في الشتاء للتدفئة. عمري ما اتكلمت عن اللكلوك دا و حد من الولاد فهم، لذا لزم التوضيح. متسألونيش ليه مافيش لكاليك للولاد. معرفش. دي مش مسؤليتي. دي مشكلة تروحوا تعرضوها على جمعيات المساواة بين الرجل و المرأة في دول عدم الإنحياز المتقدمة
نرجع لموضوعنا.. فهل هناك من يعرف طريقة نقنع بها الساعة ال6 أن تأتي في ال9؟ شكرا يا حضرات لتعاونكم