بكره الي بستناه

أنا ماليش أوي في كتابة شعر العامية. بس من وقت للتاني بحب أجرب كده. :) يا رب يعجبكم.

بكره الي بستناه

وكل يوم أصحى على فجر جي جديد
يا فجر هات بكره.. شايل لي حلم سعيد
هات الهنا بسرعة قبل الأوان مايروح
لحسن يدوب بكره في الليل ألي جايلي أكيد.

يا بكره هات بكره
بكره الي بستناه
مش بكره له بكره
واعيش أجري وراه.
وبكره اقول بكره..
وبعده اقول بكره..
لحد ما يجي بكره..
ألي مافيش وراه.
واحزن عليك يا بكره.. يالي ماجتش معاه.

يا بكره أملي خلص!
يا بكره عمري خلص!
يا بكره يالي خلص.. وماجاشي بكره معاه.
بكره الي بستناه..

Sufie - Reflections of a Pink Owl - Background

This is the new series I'm preparing for the Eid. Sufie welcomes your questions, comments, and suggestions regarding education all along this week. :)

Sufie - Reflections of a Pink Owl

This is the new series I'm preparing for the Eid. Sufie welcomes your questions, comments, and suggestions regarding education all along this week. :)

فوازير التسع الأواخر من رضان: الفزورة الأولى

صباح الخير، كل سنة وأنتم طيبين، وحشتوني ووحشتني الكتابة ليكم
فوازير التسع الأواخر من رمضان: ماتسألونيش ليه التسع مش العشر. هو كده عشان مالحقتش أكتب واحدة لإمبارح. المهم، الفوازير دي مالهاش إيجابة معينة صح. هي إيجابتها إنكم تشغلوا مخكم وخيالكم في إيجاد رد على السؤال وألي هيكسب هو ألي هيقول أكتر رد ظريف ومبتكر وبسيط ومنطقي في نفس الوقت. على فكرة أنا عندي إيجابات على الأسئلة بس مش هعلنها إلا بعد ما تقولوا أنتم ألي عندكم. أما الجوائز فأنا لسه مافكرتش هتبقى أيه. يله! جود لاك

الفزورة الأولى: أيه ألي يخلي قطة اسمها نجوى عندها ثلاث قطط أطفال صغيرين تفتح أربع حسابات توفير في البنك بدل ثلاثة؟

الشبكة والسمكة والجزمة والفيلم السياسي الهابط

الشبكة والسمكة والجزمة والفيلم السياسي الهابط
عندما كنت صغيرة وكنا نشاهد نوبات الجفاف في إفريقيا السوداء كان يقول لي والدي رحمه الله أن علاقة المساعدة والمساندة الصحيحة بين البشر يجب أن تقوم على أساس الحكمة القديمة "لا تعطيني سمكة ولكن أعطيني شبكة." وما ألاحظه الأن من علاقات بين الحكومات والشعوب وبين الدول وبعضها فعلا يتمحور حول الشبكة والسمكة. وفيما يلي ملخص تحليلي للأوضاع السياسية الراهنة:
مصر:
• الشعب للرئيس المخلوع ونظامه: ضيعتوا الشبكة ياولاد السحلية؟ هنجيب دلوقتي سمكة منين يا أولاد الحرامية؟
• أبناء الرئيس المخلوع ونظامهم للشعب: شبكة أيه ياولاد الجعانه هوأنتم كانت حيلتكم حاجة؟
• المجلس والحكومة الحالية للشعب: يا جماعة أهدوا كده أومال وصلوا بينا على النبي. الشبكة موجودة والسمكة موجودة. أدونا بس فرصة نلفوء الشبكة عشان إتقطعت في يناير ألي فات ونشوي السمكة عشان ما تبقاش نيه.
• الثوار للشعب: فوء يا عم منك له! السمكة إتسرقت ومافيش شبكة أصلا وبيت أُمنا إتخرب
• الشعب للثوار: يا واد إهمد منك له ربنا ياخدكم مش عارفين نصتاد بالزفت وأنتم عاملين دوشة كده
أما على الصعيد العالمي:
إفريقيا السوداء المنكوبة للغرب: أعطيني شبكة ولا تعطيني سمكة.
الغرب لإفريقيا السوداء: إيه؟ إيه؟ علي صوتك مش سامعه!! إيه؟ شبكة أيه يا حمارة إسمعي كلامي السمكة أنفع وأفيد يعني هو أنتم هتكلوا شبك؟
مصر للولايات المتحدة: عارفين لو هَوبتو ناحية الشبكة بتاعتي تاني (أه ياني بس لو ألاقيها هي فين!!) أمريكا: هي أيه؟ مصر: الشبكة!!!!
ليبيا للعالم: هذه الشبكة ملكُ لنا! هذه الشبكة من البادية! من الخيمة! من الصحراااااء
أنا أصدق وأحترم كل ما علمه لي ابي رحمه الله وكل ما يحدث حولي يؤكد صحة كلامه. لكن لي تعديل صغير على المقولة وهو أن نضيف له بُعد "الجزمة". فيكون الوضع كالتالي:
• مصر للغرب: لو هاوبتو ناحية الشبكة بتاعتي تاني هاديكو.. "بالجزمة"
• مصر للنظام السابق: هات السمكة ألي سرقتها وإلا هاديك .. "بالجزمة"
• مصر للحكومة الحالية وللمصريين (ثوار بقى ولا غيره! ألي هيقعد هنا يقعد بأدبه): لو ماتلمتوش والحكومة شافت شغلها والشعب إجتهد عشان يعوضني لا هاديكوا شبكة ولا هاديكوا سمكة ولكن هاديكوا .. "بالجزمة"
• الدول العربية للعالم: إحترمونا وأدونا قيمتنا وعاملونا على قدم المُساواة معاكم وإلا هنديكم .. "بالجزمة"
• العالم للدول العربية: يا تتصرفوا عدل في الشبكة والسمكة ألي عندكم وتعرفوا إزاي تستغلوهم وتدافعوا عنهم يا إما هانخُدهم وهانديكم.. "بالجزمة"
الشبكة والسمكة والجزمة

خواطر إجتماعية – بطولة الدكتور سعيد ملوخية الزقازيقي: الحلقة 10

خواطر إجتماعية – بطولة الدكتور سعيد ملوخية. المقدمة: د. سعيد ملوخية الزقازيقي شاب في منتصف الثلاثينات، طبيب، أخصائي بواسير ومسالك بولية وخلافُه. تعامُله مع مختلف أنواع إنتاج البشر وطبيعة كشفه الطبي المخصوص جعله يرى الإنسان من زاوية مختلفة عن العادي، جعلته يفكر في البشر والمجتمع البشري بوجه عام بطريقة جديدة. فبدأ يكتب بعض الخواطر عن بعض ما يلاحظة. أنتظرونا صباح كل أحد.



10. أحد مرضى "مستشفى البواسير والأمراض العقلية" والمسؤول عن مُصلى المستشفى يقول للد. ملوخية: "شمال شوية.. شويه كمان.. أيييييوه.. فوق بقا شوية... تحت.. تحت كمان.. يمين بقا شوية فتح الله عليييك.. يمين سٍنه كمان.. بارك الله فيييك.. كده وضع اليدين تمام. أتفضل كده بقا تقدر تكبر وتصلي. تقبل الله منا ومنكم يا أخي الفاضل. د ملوخية في سره: "فاضل أيه؟ مافاضلش كده حاجة خلاص. دا ألي يشوفني كده يقول ماسك البنطلون ليقع!! ولا يفتكرني محصور ولا حاجة!! أنا جربت وضع تاني لليادين في الصلاة ونفعت. يمكن عشان القبلة هنا كده بقا ولا أيه؟!!"

دعوة مُدرسة للتصالح مع الشرطة

على فكرة أنا لا بطلب حاجة من حد ولا بفرض على حد حاجة ولا ليا قرايب في الداخلية. أنا بقول رأيي وأعتقد إن دا من حقي

كلنا فرحانين بالثورة.. طبعا! كلنا فخورين بالثورة.. أكيد! كلنا كلمنا بعض (حتى ألي كانوا متخاصمين قبلها) عشان نبارك لبعض على الثورة.. حصل! طيب.. إليكم الأتي، نفكر ونحسبها ونعقلها ونتفاهم:

أعزائنا حراس أمن الوطن الداخلي، ربنا يصلح بينا وبينكم ويعينكم على الرجوع لعملكم بفكر جديد وصفحة جديدة للتفاهم معنا كمواطنين بصورة أفضل. أهلا بكم. يا جماعة دي دعوة للتصالح مع الشرطة.. أنا فعلا حسه إني عاوزة أديهم فرصة يرجعوا في حياتنا ويقوموا بعملهم ويشاركونا الفرحة بالثورة والفخر بالإنجاز ألي حصل.. أدوهم فرصة وألي غلط في أحداث الثورة يتعاقب. دعوة التصالح لا تتعارض مع الدعوة لعقاب الجناة وفاءا لشهداء الثورة

يا جماعة، نطلع غلنا في الناس ألي ظلمونا وسرقونا ووصلونا لنسبة جهل سبعين في الميه وأكثر ومعدل إكتأب مرضي إكلنينكي وصل لواحد في كل تلاته!! مش نطلعه في شخص إتشحن ضددنا سنين ولما جه يفوق ويرجع ويعتذر لعنا سلسفيل جدوده.. طاقة التسامح والإستيعاب دلوقتي يا جماعة أولى من طاقة الإنتقام.. لو فضلنا معادينهم وهما معادينا هنخسر كلنا كل حاجة ولو إستوعبناهم هندمج طاقتهم جوه طاقتنا ونبقا قوة لا تُقهر في وقت كل الدنيا متربصة بينا. يا جماعة دي دعوة للتصالح مع الشرطة من بني آدمه أصلا مش متسامح بطبيعتها لكن حسه إن دا التصرف العاقل الحكيم والأكثر نفعا دلوقتي.

أيوه أقبلهم وأستوعبهم وأعلمهم معنى كلمة "سلمية" وأعالج نظامهم المريض خصوصا أنهم هم نفسهم بأفرادهم بيحاولوا ونظامهم مش مساعدهم ورؤساءهم معظمهم مش مساعدنهم. أنا يا جماعة ممكن أقبل أستقبل حد في بيتي عشان نتعاتب ونتصافا وأفهمه بالأدله أنه غلطان.. مش أوفقه على باب البيت وهاتك يا شتيمة وضرب ومتوقعة أنه يفهم بقا هو غلط في أيه!! يا جماعة أنا بنشتغل بقالي سنين في تعليم وتدريب الكبار وفي تنمية الطاقات البشرية وكمان في تأهيل وتدريب المعلمين خصوصا في المدارس، ومجالي علمني ألا أيأس من العنصر البشري بسهولة، أنا وكتير من زملاء مجالي المستشارين الأكاديميين قعدنا كتير عشان نعود نفسنا على المفاهيم الجديدة بتاعت التدريس المتحرر الديمقراطي ونحرر دماغنا من الأفكار والمماراسات المهنية التقليدية المتحجرة.. يعني أدي المدرس فرصة سنين يغلط ويحسن نفسه ولما تحصل في البلد نقله كبيرة زي دي ماقفش قدام الضابط وأقوله غلط في أيه ويعدل سلوكه إزاي وأديله فرصة يسمع كلامي وينفذه؟
يا جماعة الضابط دا أيه؟ دا شخص أصل وظيفته أنه يطلع شايل روحه على كفه زي ما بيقولوا عشان يتعامل مع أسوأ أنواع البشر وأكثرهم عنفا عشان يحققلنا الأمان، و لسبب كلنا عرفينه في السنوات الكتيييييرة الأخيرة بقا يتقال للناس دي وجنودهم وعساكرهم من رؤساءهم وقيادتهم النظام أولا، أنت ثانيا، الناس (لو في فرصة!) ثالثا! مافيش حصل خير.. وألي كان بيوزن المعادلة بأخلاقه كان بيُنكل بيه من قياداته ويتنقل ويصتقصدوه ويشتموه و و و.. وكلنا عارفين..

دلوقتي آن الأوان نقول للضباط دول:


• ألي فيكم كان وراء دم الشهداء بإعطاء أمر أو بالقرار أو بالتنفيذ: العقاب الحاسم قادم.. في الأرض وفي السماء
• ألي فيكم كان شريف في الزمن الصعب: أهلا بيك وإحنا أسفين إن حزننا على شهداءنا أخدك في الرجلين، إسحب إستقالتك، وإرجع شغلك، إحمي الضعيف أكتر من الأول وكون على المجرم أشد من الأول.

• ألي فيكم كان ضعيف ماظلمش بس سكت على الظلم زي الشيطان الأخرس: بنسألك: نبت لك ذيل من نار في أخره سهم؟ لأ؟ طلع لك في قُرتك قرنين حُمر؟ لأ؟ يبقا أنت لسه بني آدم ولسه بيجري في عروقك دم مليان شهامة شرقية ومصرية.. إشتغل أكتر وأحسن من الأول وأنوي يبقا دا تكفير عن السابق وإدعي ربنا يغفر ويسامح ويقبل العمل وصدقني العباد هايجوا في المرحلة التاليه لرضا الله وقبوله.

• ألي كان يد من أيادي الحُكم الجائر: أنت ونيتك، عندك إستعداد قلبي ونيه حقيقة للتوبة ربنا هايفتح لك ألف باب لتكون في عون الأمه ونحن نلملم جراحنا ونحاول أن نبني وطنا وسبحانه مالك الملك ومدبر الكون. أدور على ألي طلمك بأنه قطع الوصال بينك وبين ربنا بأنه سلطك علينا وظلمنا بإيدك و أعمل لصالحنا وحمايتنا وأنت مدرب وعارف تعمل دا إزاي. أما لو ماعندكش إستعداد للإصلاح ولعمل أيا مما ذكرت، فأنت وقدرك مع الله، يفعل بك ما يشاء سبحانه لا راد لقضاءه ولا يُسأل عما يفعل وهم يُسألون

كلمة أخيرة: يا جماعة أنا مُعلمة وأملك من استقلال الرأي والفكر والكرامة والقوة ما يجعلني أرى أن في ربطي تصالحي مع الشرطة باعتذار أو بوقت ما أو حدث ما صورة من صور الضعف. أنا سلوكي ورأيي فعل وليس رد فعل. رد الفعل ضعف أما المبادرة فقوة وشجاعة ليس لها مثيل. وأنا مؤمنة بالله وقوة إيماني في المبادرة السلمية. أنا قررت التصالح مع الشرطة كهيئة وفي انتظار أن يُرينا الله من هذا النظام و هذا الهيكل أفضل ما فيهم في الأيام القادمة إن شاء الله.

صباح الخير والهنا والسعادة على كل المطحونين ألي في الشغل من الفجر ألي بيسمعونا في إذاعة الملوخية هنا، أعزائي مستخدمي الإنترنت: أرجو قبول فائق إعتذاري عن تأخر الدكتور سعيد ملوخية الزقازيقي عن تقديم خواطره يوم الأحد: وعلى رأي المثل: "بتر لايت ذان نيفر." ها هي خواطر هذا الأسبوع. إنجوي وفي انتظار ردود وآراء حضراتكم. خواطر إجتماعية – بطولة الدكتور سعيد ملوخية. المقدمة: د. سعيد ملوخية الزقازيقي شاب في منتصف الثلاثينات، طبيب، أخصائي بواسير ومسالك بولية وخلافُه. تعامُله مع مختلف أنواع إنتاج البشر وطبيعة كشفه الطبي المخصوص جعله يرى الإنسان من زاوية مختلفة عن العادي، جعلته يفكر في البشر والمجتمع البشري بوجه عام بطريقة جديدة. فبدأ يكتب بعض الخواطر عن بعض ما يلاحظة. أنتظرونا صباح كل أحد. الحلقة 7: فقرة من إحدى المحاضرات التي ألقاها الدكتور مؤخرا في مؤتمر علمي دولي: "إنهارده هنتكلم عن أنواع الوز. أه والله! أنواع الوز. 1. في وز بلدي، ودا مصري يتغذى على الروائح الكريهه ويتميز بلونه البني الغامق. 2. وفي وز عراقي ودا مصري بردو بس مقيم في الخارج، تعرفه من تفوقه في أنه بيكاكي كتير، لكن لونه باهت وأحيا يتحول إلى الشفاف وتقدر تشوف ألي وراه وهو واقف. الشيئ المشترك بين النوعين والذي يثبت علميا أنهم مصريين هو أنهم يتكاثرون بالإنقسام... الإنقسام على أنفسهم.

خواطر إجتماعية بطولة الدكتور سعيد ملوخية: الحلقة 6

خواطر إجتماعية – بطولة الدكتور سعيد ملوخية. المقدمة: د. سعيد ملوخية الزقازيقي شاب في منتصف الثلاثينات، طبيب، أخصائي بواسير ومسالك بولية وخلافُه. تعامُله مع مختلف أنواع إنتاج البشر وطبيعة كشفه الطبي المخصوص جعله يرى الإنسان من زاوية مختلفة عن العادي، جعلته يفكر في البشر والمجتمع البشري بوجه عام بطريقة جديدة. فبدأ يكتب بعض الخواطر عن بعض ما يلاحظة. أنتظرونا صباح كل أحد.

خواطر إجتماعية بطولة الدكتور سعيد ملوخية: الحلقة 6: نقول للي مش فاهمنا ونوضح فكرتنا: يا ناس إحنا مش مستخدمين الصليب دا إعتقادا فيه ولا اعتراضا عليه، دا موضوع تاني مش وقته ولا مكانه هنا، إحنا مستخدمينه هنا رمز لقطاع من المجتمع إحنا شايفين أننا لازم نؤاذره بعد الأحداث الأخيرة، يعني مثلا لما بتوع الدلتا يهاجموا بتوع الصعيد فا القاهريين يحطوا علم عليه برج القاهرة ماسك قفل مصدي مثلا رمزا لمساندهم للوجه القبلي يبقوا كفروا؟ أو مثلا بتوع العريش يعتقلوا بتوع بنها فالإسكندرانية يرفعوا أعلام عليها بحر بيغرق بلاص مٍش وبينقذ بلاص عسل يبقوا إنحرفوا دينيا؟!! الصليب ألي سعادتكم شايفينه دا إحنا مش مستخدمينه كمُعتقد ديني إحنا مستخدمينه كرمز إجتماعي إيديولوجي تاريخي. إرحمونا بقى. أيه رأيكم لما المشاكل ألي في حياتنا كلها تخلص وكله يبقى تمام نبقى نتناقش مع الإخوة المسيحين في الموضوع دا؟! أما دلوقتي لو سمحتم خلونا في المصيبة ألي إحنا فيها

خواطر إجتماعية – بطولة الدكتور سعيد ملوخية - الحلقة الخامسة

صباح جميل وأسبوع عمل سعيد على كل أصدقاءنا هنا وهناك وفي كل أرجاء المعمورة (بالإسكندرية والمحافظات)،

كالعادة عند خضراتكم المقدمة وخلفية الموضوع للناس ألي أول مرة يشرفوني بقرائتهم للخواطر الأسبوعية الفكاهيه بتاعتي، وبعدين الحلقة الجديدة بتاعت الأسبوع دا. أرجو أن تلقى إعجابكم. في انتظار تعليقاتكم.

خواطر إجتماعية – بطولة الدكتور سعيد ملوخية. المقدمة: د. سعيد ملوخية الزقازيقي شاب في منتصف الثلاثينات، طبيب، أخصائي بواسير ومسالك بولية وخلافُه. تعامُله مع مختلف أنواع إنتاج البشر وطبيعة كشفه الطبي المخصوص جعله يرى الإنسان من زاوية مختلفة عن العادي، جعلته يفكر في البشر والمجتمع البشري بوجه عام بطريقة جديدة. فبدأ يكتب بعض الخواطر عن بعض ما يلاحظة. أنتظرونا صباح كل أحد.


خواطر د. سعيد ملوخية 5: د. سعيد للحج البتنوني وهم يشربون الشاي ساعة العصاري وسط محصول اللبان المزروع مؤخرا في أرض الدكتور: "والله يا حج أحوال الإعلام تغُم، سايبين القضايا العربية المهمة زي خلاف هيفاء وهبي وديانا حداد وعمالين يعملوا مسابقات هبله وأين تقع قناة ستاكيوس؟ في ستاكيوس ولا غانا ولا أزريبايجان ومش عارف أيه!! تليفون الدكتور يرن، المتصل: ألو، الد. سعد مخلول؟ د.: الدكتور سعيد ملوخية يا فندم. المتصل: أه! أسف! ألف مبروك، إحنا دخلناك معانا مسابقة الغسيل وكسبت معانا... مايوه!!!

خواطر د. سعيد ملوخية الحلقة 3

خواطر إجتماعية – بطولة الدكتور سعيد ملوخية. المقدمة: د. سعيد ملوخية الزقازيقي شاب في منتصف الثلاثينات، طبيب، أخصائي بواسير ومسالك بولية وخلافُه. تعامُله مع مختلف أنواع إنتاج البشر وطبيعة كشفه الطبي المخصوص جعله يرى الإنسان من زاوية مختلفة عن العادي، جعلته يفكر في البشر والمجتمع البشري بوجه عام بطريقة جديدة. فبدأ يكتب بعض الخواطر عن بعض ما يلاحظه.

خواطر د. سعيد ملوخية الحلقة 3: يعتذر الدكتور عن تقديم خواطره الأسبوع الماضي والحالي حيث أنه يعاني من حالة إحباط وإكتئاب حادة. حدث هذا بعد أن أخبره هاتفيا الحج البتنوني أن محصول الأساتيك والبرايات المزروع بأرضه في شمال الدلتا "قد بار وعفن من الركنة." ذلك لأن الصين أرسلت شحنة أساتيك غنية بفيتامين سي أقبل أطفال المدارس على أكلها وشحنة برايات حادة الأمواس أقبل عليها طلاب الثانوي لإستعمالها في خناقات الشوارع.

أصدقائي الأعزاء، صباح جديد سعيد عليكم وأسبوع عمل موفق إن شاء الله،

خواطر إجتماعية – بطولة الدكتور سعيد ملوخية. المقدمة: د. سعيد ملوخية الزقازيقي شاب في منتصف الثلاثينات، طبيب، أخصائي بواسير ومسالك بولية وخلافُه. تعامُله مع مختلف أنواع إنتاج البشر وطبيعة كشفه الطبي المخصوص جعله يرى الإنسان من زاوية مختلفة عن العادي، جعلته يفكر في البشر والمجتمع البشري بوجه عام بطريقة جديدة. فبدأ يكتب بعض الخواطر عن بعض ما يلاحظة. أنتظرونا صباح كل أحد.
خواطر د. سعيد ملوخية 2: غريبة جدا جوزات اليومين دول، تفضل البنت من دول مُصره تتجوز الشاب ألي بتحبه وشيفاه أحسن واحد في الدنيا ولا رئيس مراجيح مولد النبي، ولما تتجوزه تبقى مش طايقها زي ما تكون عايشه مع سحلية البحر ذات العُرف البرتقالي. أه والله! أصل هي دي ألي لو وُجدت هابتقى مقرفة أوي كده. ولو قلتلها سيبيه يا ست الحُسن والجمال تتردد وتقول لك لأ ماقدرش أهو أحسن من مافيش. أكره ما عليا التردد! الرقص على السلم ألي بيضيع سنين العمر. ما هو حاجة من الأثنين، يا إما أنت مقتنع يبقى عيش يا إما مش مقتنع يبقى حاول تغيّر حياتك.

في إنتظار آراءكم :)

خواطر د. سعيد ملوخية 1

"مش فاهم!! يعني أيه راقصة ساقطة تغني وتقول "ألي عايز يلعب يلعب، خدنا أيه من الجد؟" أيوه هي ماتنيلتش أخذت حاجة من الجد لأنها عمرها ما كانت جد. لكن الناس ألي زيّنا عندهم فُنطاس جديه بيغرفوا ويشربوا منه كل يوم الصبح ودا سر كل الحاجات الكويسة ألي جوانا وألي أمثالها مفتقدنها. يا جماعة لازم نبطل حالة الشكوى والعويل الدائم دي، لأ لسه في حياتنا قيم كويسة عشان إحنا ناس محترمين

خواطر إجتماعية – بطولة الدكتور سغيد ملوخية

المقدمة: د. سعيد ملوخية الزقازيقي شاب في منتصف الثلاثينات، طبيب، أخصائي بواسير ومسالك بولية وخلافُه. تعامُله مع مختلف أنواع إنتاج البشر وطبيعة كشفه الطبي المخصوص جعله يرى الإنسان من زاوية مختلفة عن العادي، جعلته يفكر في البشر والمجتمع البشري بوجه عام بطريقة جديدة. فبدأ يكتب بعض الخواطر عن بعض ما يلاحظة. أنتظرونا صباح كل أحد.

يوميات الفيل الرمضاني 2

يوميات الفيل الرمضاني: "و قد حزن كثيرا عندما سمع الداعية الكبير الشيخ شديد سيف الدين آل صعب يفتي بأنه مثلما رفع بوحه الصباح يافطة على مزرعته تقول ممنوع دخول ولاد أبو سماعين فإنه يجب رفع يافطة ممنوع النوم أثناء الصيام!! هذا معناه أنه سيُحرم من النوم طوال الشهر حيث أن عمله الليلي يتيح له الفرصة للنوم فقط أثناء النهار. أتصل بالدايعة في صباح اليوم التالي ليسأله في المشكلة فقيل له أن يتصل بعد المغرب حيث أن الشيخ نائم

يوميات الفيل الرمضاني

وفي شهر رمضان الكريم تخرج الشياطين المتلبسة للبشر من أجسامهم وتتلبسهم روح الفيل الرمضاني.. حيث يقضي بعض البشر ساعات طويلة في حالة إستهلاك غذائي دائم. أي بني أدم يتجنن في مخه وياكل أس كريم وكنافه في ليله واحده لازم يجيله تلبك معوي

دعاء الفيل الرمضاني: "الهم تقبل أكلنا وشربنا. ألهم تقبل منا الكنافة والبقلاوة وسائر الحلويات الشرقية يا رب العالمين. الهم بلغنا الكحك يا كريم ياوهاب." أمين

الحكي علامة شفاء الراوي*

الحكي علامة شفاء الراوي*
لو لم أكن قد شُفيت لما استطعت أن أكتب عن هذا. شكرا لمن ساعدني على الخروج من هذا.
ما هو أبشع إحساس في الدنيا؟ أسواء شعور في هذا العالم الواسع الموحش هو الوحدة. ما هي الوحدة؟ هي أن تنظر في المرآه، أي مرآه (مرآة أحد الأماكن العامة في نزهة مع حشد من الأصدقاء مثلا)، فلا ترى سوى نفسك، لا ترى حولك أحد، لا ترى معك أحد. هي أن تتحدث لساعات طويلة في أي شيء ثم يدق جرس الهاتف فترد بصوت مبحوح وتجد نفسك تعتذر لعدم وضوحه لأنك ظللت صامت لفترة طويلة قبل هذه المكالمة.أن تستمع إلى أغنية جميلة جداً ومؤثرة جدا ومطربة حقا ثم تتلفت حولك لتعبر عن رأيك وإعجابك بها فلا تجد من يسمعها أو يسمعك. أن تجد نفسك لا تضحك وأنت تتابع مشهد كوميدي ببساطة لأنك لم تسمع أحد يضحك.
أن تجد أنك تتنفس طول الوقت بمفردك. لا تشعر إلا بنبضك، لا تشعر بنبض أحد إلى جانبك. لا تسمع أنفاس غير أنفاسك، وتنام وتقوم ونفس الأنفاس تخرج وتدخل نفس القلب، نفس القلب الذي ينبض وحيداً. لا يوجد سوى عَد واحد. عَد هذا العمر، هذا العمر الوحيد. هذا العمر الذي يركب سيارته وحيداً، يقود وحيداً، يسمع ويقرأ ويضحك ويبكي ويشكو ويتحدث وحيدا.
الوحدة كيان سرطاني يزحف على العمر وينساب في الدم فلا تظهر أعراضه إلا فجأه في وسط جمع صاخب في حفلة راقصة حيث لا تسمع إلا هذا العَد المنتظم المتواصل لنبض واحد ونَفَس واحد. وبمرور الوقت يصبح التنفس، هذه الهبه الربانية، هذا السلوك الآلي العبقري، عبء.
*العنوان مأخوذ من رواية

رحلتي والأفيال الأربعة – الحلقة الثانية – اللقاء مع الفوكس

رحلتي والأفيال الأربعة – الحلقة الثانية – اللقاء مع الفوكس
في ريسبشن الأُوتيل:
منذر: أوعي يكون حمام الغرفة أي كلام.
كمال: أنا عايز السرير بعيد عن الشباك، يعني في الدفا.
هيام: أنا عايزة فيو البحر واسع.
أمل: أنا عايزة الغرفة في دورعالي بعيد عن دوشة الشارع.
أنا: مساء الخير، لو سمحت عايزة الغرفة اللي ممكن ينزل فيها وزير الإسكان لو جِه عندكم.
الريسبشنيست: نعم؟!!
أنا: عايزة غرفة دفا وعلى البحر وهادية وحمامها مريح.
الريسبشنيست (بأدب وحرارة صادقين): لا سلامة حضرتك ألف سلامة، إن شاء الله صحتك تتحسن عندنا.
--------------------------------------------------
أنا: يا جماعة أهمدوا بقى!! إرحموني شوية من الدوشة والزن على دماغي! غريبة أن هذه الأفيال بآذانها الضخمة لا تسمعني عندما أشتكي منها!
--------------------------------------------------
في الغرفة، أعتقد أني نمت! يصعب التأكد من ذلك في ظل أن أمل باتت في فراشها تعمل ولا تعبأ بالفوكس، وهيام تسمع أغاني عاطفية وهي سرحانة في حب الفوكس، وكمال يفكر فيما سيرتدي غدا للقاء الفوكس، ومنذر يحسب ويخطط وينظم تفكيره لما سأقول وأعمل وما سيقول ويعمل الفوكس.
--------------------------------------------------
في صباح اليوم التالي:
بدأت الطقوس اليومية المقدسة وكأني في بيتي. عادتا ما أرتدي ملابسي وأضع زينتي وأنا أسمع الموسيقى وأرقص. هذا يدخلنا جميعا في حالة من النشاط الرائع حيث يؤدي كلٌ منا رقصته، أمل تتحرك برشاقة تدريباً لنفسها على ال stage movements تحضيراً لمحاضرتها. كمال يوجهها للوصول إلى أفضل نتائج ممكنة. هيام ترقص وتغني بأعلى صوتها، منذر ينظم حركة الجميع بحذر حتى لا نرتطم ببعض.
أنتهت هذه الرقصة الجميلة باتصال الفوكس حيث كان منتظرا في سيارته.
--------------------------------------------------
في الأسنسير:
بدأت حالة التعبيئة والإستعداد. وبآلية معجِزة أتخذ كل فيلق من الفيالق مكانه. أتخذ كل من أمل ومنذر أماكنهم الإستراتيجية التكنيكية التكتيكية في المقدمة لضمان عدم نجاح الجيش الأخر في اختراق الصفوف للوصول لهيام. كمال يلتزم الحياد في العموم حتى يحتاج الموقف لتدخله. ما تحزني كثيرا هو شحوب لون هيام في مثل هذه المواقف الحربية.. أقصد العاطفية، ولكن هذه ملحوظه غير مهمة.
أثناء نزول الأسنسير سمعت هيام تدندن بالموال الأتي:
الفوكس الفوكس الفوكس،
الفوكس ياخويا الفوكس،
حبيبي الفوكس الفوكس.
ولكن هذه أيضا نقطة فرعية.
--------------------------------------------------
حبيبي الفوكس.. أحم أقصد الفوكس بس فقط (فلا أحد يعرف النصيب فين، يمكن تحت الكنبة ويمكن ورا الطربيزة أو ماشي عالحيط) هذا الفوكس المصري أسمر اللون. أنا لا أحب الفوكسز البيض، طويل القامة فأنا لا أحب الفوكسز القصار، يرتدي نظارة شمس طبية، فهو فوكس أكاديمي مثقف ويعتبر من عقول الأمة المفكرة. كان ينتظرني في سفينته الرمادية المضلعة. رمقني بنظرة فوكسية ساحرة عندما ركبت وقال لي: "هاو هاو!" وقبل أن أرد:
هيام: اللااااااااه! شاعر!
منذر: تُرى ماذا يقصد؟
أمل وكمال: ضعيف البلاغة، ضعيف العقل ومخارج ألفاظه أشبه ما تكون بمخارج ألفاظ الليمبي.
الفوكس: تحبي نروح فين؟
كمال: المنتزة. جمال المكان مثالي.
الفوكس: عايز أتكمل معاكي في كام موضوع مهم.
هيام: بعدين لما نوصل. خلينا دلوقتي نسمع أغاني حلوة ونغني ونضحك ونتكلم.
الفوكس: فكرة هايلة. ضحكتك جميلة.
وهنا انقض عليه منذر: كلمة كمان وها... تيييييييييت بطن ظهر كفك!
أمل (باستهزاء شديد): عارفة. أنت مش أول واحد تلاحظ كده.
هيام (تبتسم بشحوب): صحيح؟ شكراً على عطفك دا.
وانطلقت أنا والفوكس نجري بالسفينة المضلعة. نضحك ونتكلم في توافه الأمور. كان وقتا لطيفا. غريبة هذه الفوكسز، منهم من يمتلك عقلا راجحا ولا يمتلك ذوقا فنيا ولا حسا رفيعا مرهفا، ومنهم من يمتلك الحس والعقل ولا يمتلك المرح ولا الجاذبية، ومنهم من يمتلك كل ذلك ولا يمتلك القلب المؤمن، ومنهم من يمتلك كل ذلك ولكن يفشل في اجتذاب هيام (بنظرها الضعيف) إليه. وفي كل الحالات كمال غير راض، وأمل ترغب في المزيد من كل شيء، منذر قلق وحذر جدا، وهيام خائفة وممزقة وضعيفة.
--------------------------------------------------
ونحن جميعا نتمشى في المنتزة، دار الحوار التالي:
الفوكس: تشتغلي معايا في الشركة بتعتي لما نتجوز؟
أمل: هو إحنا هنتجوز؟ أنت معرضتش عليا قبل كده!
الفوكس: منا بقولك أهوه.
كمال: أنا أسف – مش موافق. كان المفروض العرض دا يكون أحسن من كده في كل شيء.
هيام (وهي غارقة في دموعها ولونها شاحب كالموت نفسه): يعني أنت عايز تتجوزني عشان تضرب عصفورين بحجر؟! زوجة هايله وست لطيفة وموظفة ببلاش؟
وكأن الفرصة جاءت سانحة لمنذر:أنا قلت لكم قبل كده ألف مرة: هذا الشخص لا يصلح، سيء النية وأناني واستغلالي ولا يحب هيام أو بالأحرى يحب أمل هذا الحب الأناني المريض، يحبها لنفسه لما فيها من منفعة له.
كمال: أنا أحتقر هذا الكائن من كل قلبي. أمل، مالك ساكته كده ليه؟ حينها انتبهت أن أمل تحتضن هيام بقوة تغطيها، فلا يظهر منها شيئا تقريبا. هيام غارقة في بحر من الدموع وانكسار القلب والإحباط والخوف والشك في قدرتها على حسن اختيار شريك الحياة. أما أمل فكانت تحتضن هيام وجهها جامد بلا انفعالات، بلا حراك وعيونها شاخصة زاهله. كأنها لا ترى، ليس فيها نظر، ليس فيها نور.
وسط كل هذا الجنون، شرعت برأسي ونظرت إليه وإلى كل نمط الحياة التي يمثلها هو، وأخذت نفسا عميقا وقلت بأعلى صوتي:
أنا حُرة!! أنا حُرة! أنا حُرة وهفضل طول عمري حُرة. حُرة من الأسر. كل أسر. أسر التصور أنك فعلا بتحبني، أسر وهم أني مقدرش أعيش وأعيش سعيدة من غيرك، أنا حُرة. حُرة منك ومن الحُزن ومن أسر ذكرى كان المفروض تكون سعيدة. أنا حُرة من أسر الغلط، حتى من أسر الغضب، انا حُرة من أسرك، حُرة منك ومن الميل إليك، أنا حُرة حتى من كراهيتك، الكُره زي الحب، كُله أسر. أنا حُرة حتى من الكُره. ومن سيأتي بعدك سيهزأ منك، دون أن يعرفك، على ما فاتك بغباءك. أنا سأعيش بعدك وشجن تجربتي معك سيزيد من عمقي وسيوضح ألواني. أنا، أنا حُرة وسأعيش من بعدك حُرة وأسعد وأجمل.
--------------------------------------------------
في المساء،
أرتديت فستان للسهرة على زوق هيام أحمر في أسود، أدقنت وضع طلاء أظافري الأحمر وأحمر الشفاه بمساعدة كمال ونزلت لحفلة مقامة في الفندق كان أصدقائي (البشر) قد قرروا حضورها. في صخب الحفل كانت هيام صامته. نجحت أمل بكثرة حديثها عن العمل في إشغالها عن مشاكلها. كمال حريص على أن يحافظ على مزاجي رائقا طوال الوقت، منذر رجل حراسة هُمام فشر إسماعيل يس في "إسماعيل يس في الشرطة". دعاني أحد الأصدقاء للرقص، وأنا على خشبة المسرح أرقص وأضحك سمعت المغنية تقول: "أنا حُرة. أنا حُرة من الزُل والقهر والكُره والأسر والحزن والغضب. أعرف أني شجية، لكن أنا حُرة، حُرة وسعيدة. أنا مليئة بالحيوية، مليئة بالحياة. أنا حياة. أنا الحياة."

رحلتي والأفيال الأربعة - الحلقة الأولى

الحلقة الأولى:
على طريق الإسكندرية (اسمه القاهرة – الإسكندرية الصحراوي لكني أفضل عدم ذكر القاهرة مقترنة بالإسكندرية ما استطعت) قررت تشغيل الموسيقى حيث أنني لا أتصور أن أكون في حالة أو وقت أو موقف يمكن فيه أن أسمع موسيقى ولا أسمع. استأذنت كوكبة الأفيال في أن أسمع ماجدة الرومي ليس فقط لأني أحبها صوتا وفنا ولكن لأنها من الأصوات النادرة التي اتفقت عليها رأي كل من هيام وأمل في أنها رائعة. كمال لا يحب كثيرا من أغاني ألبومها "أحبك وبعد" حيث أنه قد أستشعر بعض النشاذ في بعض الأغاني حين تفتح صوتها في قمة أو نهاية بعض الكُبليهات. منذر لا يحبها لأنه يراها نقطة في منظومة زحف الثقافات غير المصرية إلى الوجدان المصري الأصيل، وكون ملحنها الأساسي جمال سلامة (المصري) لا يزيد الموقف تعقيدا. زد على هذا أن نوع الفن الذي تقدمه يحتوي على كم من الغضب والإحباط يساعدان المستمع على خروج من حالة الثبات الإنفعالي اللائقة وبعد مناقشة حامية الوطيس بين الأفيال الأربعة قررت تشغيل النشيد القومي حيث أنه من الصعب الخلاف حوله ثم بعض الموسيقى الهادءة المُهادءة للأعصاب.
عند مدخل المدينة دار الحوار الأتي:
أنا: هيه! هتكلوا أيه وفين يا شباب؟
الجميع في وقت واحد وبصيغ مختلفة: زي ما تحبي، أللي نفسك فيه. وقبل أن أرد،
كمال: أنا رأي نروح Fish Market سمك وفير، أطباقهم رائعة خدمة جيدة منظر البحر هناك لطيف.
أمل: لكن أسعارهم مبالغ فيها والجو العام للمكان غير مريح حيث هناك كثير من غير المصريين. أنا رأي نروح سان ستيفانو، حتى هناك ممكن أشوف بعض الزملاء وأعرف أخبار الشغل في الإسكندرية.
هيام: شغل أيه؟ إرحميني بقى!! أنا نفسي أروح المطعم الجريجي، موسيقاه جميلة، الديكور جميل، الناس هناك هادئين كده مش مستعجلين وعايزين يكلوا ويجروا وكمان فيو البحر هناك يجنن.
منذر: فيو البحر؟ هو أنت نظرك بيجيب البحر من هناك فوق؟ يا هيام فوقي؟ وبعدين إفرضي روحنا لقينا الجريج دول حطين يافطة كده من عينة "ممنوع دخول ولاد أبو اسماعين." بتاعة بوحه. أنا بقول نروح محمد أحمد بتاع الفول والطعمية واهو يبقى غدا وعشا.
فقت وأنا أصرخ في الجميع حتى أصبت تصداع بعدها: "بااااااااااااس! أنا هأكل تشيكن سيزر سلاد من تريانون عشان صحي زي ما كمال وأمل بيحبوا وهو عالبحر يا هيام ومفيهوش قلق يا منذر.
أنا كلت واتبصت لكن كان ممكن أكون أسعد وحياتي تبقى أسهل لو مكنتش بحاول أرضي الأفيال الأربعة كلهم وفي وقت واحد. أنتظروا الحلقة القادمة حيث قابلتهم بالفوكس! ;)

رحلتي و الأفيال الأربعة - المقدمة

رحلتي و الأفيال الأربعة
المقدمة
لأني أحب كثيرا السفر إلى الإسكندرية ، ولأني لاحظت أن مزاجي في الفترة الأخيرة كان معوج ومزوزأ و جايب رجِل ورا زي الخيل اللي مزاجه متعكر، قررت السفر. حزمت أمتعتي ولم أخذ معي ملابس كثيرة لأني أعرف أني لن أجد مكان في شنطة العربية لأضع فيه حقيبة كبيرة. أعرف أن أمتعة باقي المسافرين ستكون أكثر. لا يمكن أن أسافر، لا أعرف كيف أسافر دون أن آخذ معي كمال و أمل وهيام ومُنذر.
كمال، هو فيل في منتهى الشياكة، حسن المظهر، دائما ما تراه مُنمق، نظيف، متعطر لا يرتدي إلا السينيهات، فساعته رولكس وبدلته مش عارف إيه وحزائه أيه. هو فيل مهذب لأنه لا يقبل على نفسه غير ذلك. ولكنه فيل يصعب إرضائه فهو دائما ما ينشد التمام في كل شيء. و أسوأ ما فيه أنه يسوس كل من حوله ويدفعهم إلى أخر المدى لكي يقدموا أفضل ما عندهم وأكثر، ومع ذلك لا يعرف الرضا طريقا إليه.
مُنذر، فيل حسن النيه جداً، جداً! هادء الطباع وعاقل جداً، وحكيم. هو فيل منطقي التفكير. ولكن قدرته العجيبة على النقد والإنتقاد ووعيه الدائم العميق (الذي يعرف الكل أنه حقيقي) بالنواقص والمشاكل سواء الحالية أو المحتمل حدوثها في المستقبل يجعل منه كيان ضخم موثوق فيه ولكنه مُنفر في نفس الوقت.
أمل، فيله طموحة، متميزة جداً في عملها، موهوبة في كثير من جوانب الحياة. مرحة ومتفائلة جداً وماهرة، لديها قدرة غريبة على الوصول لأفضل نتائج ممكنة مهما كانت الظروف المحيطة صعبة. عصبية بعض الشئ خصوصاً عندما تتعلق الأمور بالأكل أو بمطربها المفضل صالح عبد الحي أو بمستقبلها المهني.
هيام، فيلة فنانة بمعنى الكلمة، نظرها ضعيف بعض الشئ، فهناك أشياء بأكملها لا تراها لأنها صغيرة الحجم مثل: طربيزة السُفرة في البيت، النيش، السيارات الهامر داكنة اللون وبعض النظريات العلمية مثل النسبية. أما الأشياء الأكبر حجما مثل المباني تحت الإنشاء والقضية الفلسطينية أوالمصيبة في أولها فتراها ثنائية (بتشُفُهم إتنين يعني!)
في فجر يوم الجمعة تحركت سيارتي (كوكو فاتنة المهندسين) متجهة إلى الإسكندرية وهي محملة ومثقلة بي وأربعة أفيال. أنتظروا الحلقة الأولى يوم السبت إن شاء الله.